ကမ္ဘာ့အများပြားဆုံး မြွေများစုဝေးရာအရပ် (သို့) ကမ္ဘာ့အကြီးမားဆုံး မြွေတွင်းကြီး။ကမ္ဘာပေါ်မှာ စိတ်ဝင်စားဖွယ်ရာ နေရာဒေသတွေ အမြောက်အများရှိကြပေမဲ့ အလွန်တရာကိုမှ တုန်လှုပ်ဖို့ကောင်းတဲ့ မြွေအကောင်ရေပမာဏတို့
ခိုဝင်ပုန်းအောင်းနေတဲ့ ကမ္ဘာ့အကြီးဆုံး မြွေတွင်းလိုမျိုးကတော့ ထူးခြားဖြစ်စဉ်တစ်ခုပါပဲ။မြွေပေါင်း ၇၅,၀၀၀ လောက် တွန့်လိမ်လူးထွတ်နေတဲ့ ဒီတွင်းကြီးဟာ ကမ္ဘာ့ခရီးသွားတွေအတွက်တော့ ဆွဲဆောင်ရာနေရာတစ်ခု ဖြစ်လာခဲ့ပြီး ကနေဒါနိုင်ငံ မြောက်ပိုင်းက Narcisse, Manitoba မှာ တည်ရှိပါတယ်။
ဒီမြွေတွင်းရဲ့အမည်ကတော့ Manitoba, Narcisse Snake Dens လို့ သိရပြီးကမ္ဘာ့အကြီမားဆုံး မြွေများစုဝေးမှုကို ဓာတ်ပုံရိုက်လိုသူများနဲ့ လေ့လာလိုသူများအတွက်တော့ စိတ်ဝင်စားဖွယ်ရာ ဒေသတစ်ခုပါပဲ။
ဒီတွင်းရဲ့ သဘောတရားဟာ နွေဦးပေါက်တိုင်း အနီရောင် ဂါတာမြွေ အမြောက်အမြားက ထုံးကျောက်လိုဏ်ဂူများအတွင်း၌ ရောက်ရှိလာတတ်ကြပြီး အမတစ်ကောင်တည်းကို မြွေထီးတစ်ရာအထိ မိတ်လိုက်ကြလေ့ရှိပါတယ်။
ဒီအတွက်ကြောင့် အမဟာ စိတ်ဖိစီးမှု အလွန်များပြားပြီး တွင်းထဲကနေရုန်းထွက်ဖို့ ကြိုးစားနေကြောင်း ပညာရှင်တစ်ယောက်က ဆိုထားပါတယ်။
လျှောကျရှုပ်ထွေးနေတဲ့ မြွေတွေဟာ အရေအတွက် များပြားလွန်းတဲ့အတွက် ရူးသွပ်တဲ့ပုံစံဖြစ်ပုံရသော်လည်း အနီးကပ်ကြည့်ခြင်းဟာ သူတို့ရဲ့အလှကို အကတစ်ခုလို ဖော်ကျူးနေတယ်လို့လည်း ဆိုကြပါတယ်။
ဒီတွင်းဟာ တကယ်တော့ မြွေတို့ရဲ့ မိတ်လိုက်တွင်းလို့လည်း ခေါ်ဝေါ်ကြလေ့ရှိပြီးအထီးနဲ့ အမ အရေအတွက် မမျှတတာကြောင့် အထီးတွေက သူတို့ရဲ့ မေးစေ့နဲ့ ပွတ်ပြီး အမကိုယ်ကို တွယ်ကပ်နေတတ်ကြရင်း မိတ်လိုက်ဖို့ အချိန်ကောင်းကို စောင့်ဆိုင်းနေကြတာပါ။Manitoba ကျေးလက်ဒေသရဲ့ ကမ္ဘာပေါ်တွင် မြွေအများဆုံး ပမာဏအကြောင်းက လူမှုကွန်ယက်ရဲ့ ကျေးဇူးတွေကြောင့် ကမ္ဘာအနှံ့ကျော်ကြားလာခဲ့တာဖြစ်ပါတယ်။